無論係古代定係現代嘅戰爭，都講求進攻與防守，因為只要是但一樣做得唔好，都會好影響到戰況。之不過史友們又有冇諗過，其實睇落「乜都唔做」可能都足以取勝呢？阿史今次就同大家講一講「以逸待勞」啦！

所謂嘅「以逸待勞」，其實就係出自兵法三十六計第四計，原文係「困敵之勢，不以戰；損剛益柔」，意思即係困敵果陣可以以消耗敵人嘅力量為主，令到敵方由強變弱，我方就可以因勢利導，將被動化為主動。而喺歷史上，就有一場係以呢招取勝嘅戰事。

喺西漢末年，隴甘軍閥隗囂脱離劉秀，去到投靠四川稱帝嘅公孫述，劉秀大怒甚至仲派兵去打隗囂。佢派出征西大將軍馮異前去佔領栒邑，隗囂得知消息後，就先派部將去搶佔有利地形，而馮異就向部下表示，呢場戰爭要同隗囂「以逸待勞」，所以要喺隗囂之前佔領栒邑。

結果，馮異嚴密封鎖消息，緊閉城門，唔做任何迎戰準備，令到將士可以休整，而當隗囂軍隊到達城下，馮異就突然叫部下亮出帥旗，當場令到隗囂軍隊大驚四下逃竄。馮異隨即領兵出城，大敗敵軍，成功以「以逸待勞」取勝。

原圖嚟自網絡